idrak hi muhaal hai KHwab-o-KHayal ka

idrāk hī muhāl hai ḳhvāb-o-ḳhayāl kā

dil ke varaq pe 'aks hai us ke jamāl kā

rotī nahīñ huuñ maiñ kabhī duniyā ke sāmne

rakhtī huuñ hausla maiñ nihāyat kamāl kā

haiñ marhale 'ajīb ye ishq-o-ḳhirad ke bhī

lamhoñ meñ kar rahī huuñ safar māh-o-sāl kā

darvesh hai koī to qalandar valī koī

bandoñ ne paayā 'ishq meñ rutba kamāl kā

itne sukūñ se maiñ ne kiyā 'ishq kā safar

aayā nahīñ gumān kisī ehtimāl kā

kaisā 'ajīb daur hai maujūda daur bhī

mafhūm koī samjhe na dil ke savāl kā

dam ghuT rahā ho jab mirā apne vajūd meñ

kyā ḳhaak tazkira ho firāq-o-visāl kā

kartī nahīñ 'sabīla' gila maiñ ye soch kar

sāthī nahīñ yahāñ koī ranj-o-malāl kā

idrak hi muhaal hai KHwab-o-KHayal ka

dil ke waraq pe 'aks hai us ke jamal ka

roti nahin hun main kabhi duniya ke samne

rakhti hun hausla main nihayat kamal ka

hain marhale 'ajib ye ishq-o-KHirad ke bhi

lamhon mein kar rahi hun safar mah-o-sal ka

darwesh hai koi to qalandar wali koi

bandon ne paya 'ishq mein rutba kamal ka

itne sukun se main ne kiya 'ishq ka safar

aaya nahin guman kisi ehtimal ka

kaisa 'ajib daur hai maujuda daur bhi

mafhum koi samjhe na dil ke sawal ka

dam ghuT raha ho jab mera apne wajud mein

kya KHak tazkira ho firaq-o-visal ka

karti nahin 'sabila' gila main ye soch kar

sathi nahin yahan koi ranj-o-malal ka