ima-e-ghazal karti hain mausam ki adaen

īmā-e-ġhazal kartī haiñ mausam kī adā.eñ

ik mauj-tarannum kī havas meñ haiñ fazā.eñ

naġhmoñ kī zabāñ meñ koī samjhe to batā.eñ

kyā chiiz hai ye tarz ye tarheñ ye adā.eñ

roke na ga.e sīna-e-ḳhārā se vo tūfāñ

haiñ jin ko kināroñ meñ liye nañg qabā.eñ

ā.īne se hotī haiñ salāheñ ki kisī ko

jab ḳhuub miTānā ho to kis tarah miTā.eñ

aisī hī tire shahr meñ hotī hai muravvat

aisī hī mire des meñ hotī haiñ vafā.eñ

dekhe koī aflāk kā ye josh-e-tabāhī

tinke ko Darnā ho to tūfān uThā.eñ

Thahrā huuñ isī baat pe maiñ lā.iq-e-tāzīr

jis baat pe baḳhshī ga.iiñ auroñ kī ḳhatā.eñ

dīvānoñ ko duniyā se ulajhne kī kahāñ taab

fursat ho to ik aur hī duniyā na banā.eñ

ye kaun se zindāñ kī girā.ī ga.ī dīvār

ye kaun sī ta.amīr kī uThtī haiñ binā.eñ

ai maskan-e-ḳhūbān-e-zamāñ shahr-e-azīzāñ

ham bhī kabhī bikne tire bāzār meñ aa.eñ

ima-e-ghazal karti hain mausam ki adaen

ek mauj-tarannum ki hawas mein hain fazaen

naghmon ki zaban mein koi samjhe to bataen

kya chiz hai ye tarz ye tarhen ye adaen

roke na gae sina-e-KHara se wo tufan

hain jin ko kinaron mein liye nang qabaen

aaine se hoti hain salahen ki kisi ko

jab KHub miTana ho to kis tarah miTaen

aisi hi tere shahr mein hoti hai murawwat

aisi hi mere des mein hoti hain wafaen

dekhe koi aflak ka ye josh-e-tabahi

tinke ko Darna ho to tufan uThaen

Thahra hun isi baat pe main laiq-e-tazir

jis baat pe baKHshi gain auron ki KHataen

diwanon ko duniya se ulajhne ki kahan tab

fursat ho to ek aur hi duniya na banaen

ye kaun se zindan ki girai gai diwar

ye kaun si tamir ki uThti hain binaen

ai maskan-e-KHuban-e-zaman shahr-e-azizan

hum bhi kabhi bikne tere bazar mein aaen