ایمان کی دولت لٹتی ہے قربان جوانی ہوتی ہے

ایمان کی دولت لٹتی ہے قربان جوانی ہوتی ہے

جب عشق و محبت میں باہم پیغام رسانی ہوتی ہے

ہر برگ گل نو رستہ کو جس رخ سے اٹھا کر بھی دیکھو

میرے ہی دل خوں گشتہ کی تحریر کہانی ہوتی ہے

معصوم نگاہوں میں ان کی ہلکا سا تبسم ہوتا ہے

دنیائے تمنا میں میری جب آگ لگانی ہوتی ہے

ممکن ہی نہیں دل تھام کے تم مجبور کرم ہو کر نہ رہو

وہ میری کہانی ہوتی ہے جو میری زبانی ہوتی ہے

آغاز ہی جس کا اے ظاہرؔ انجام فراموشی نکلے

کیا ایسی جوانی کا کرنا جو خود بھی دوانی ہوتی ہے