inT diwar se jab koi khisak jati hai

iiñT dīvār se jab koī khisak jaatī hai

dhuup kuchh aur mere sar pe chamak jaatī hai

kitne darvāze mujhe band nazar aate haiñ

aañkh jab uTh ke sar-e-bām-e-falak jaatī hai

mujh se is baat pe nārāz haiñ arbāb-e-ḳhirad

baat aa.ī huī hoñToñ pe aTak jaatī hai

mutma.in ho ke kabhī saañs na leñ ahl-e-chaman

aag sīnoñ meñ havā pā ke bhaḌak jaatī hai

jaane kyā baat hai ab rāh-e-vafā meñ aksar

zindagī apne hī saa.e se ThiThuk jaatī hai

ik hamīñ ābla-pā.ī se gila-mand nahīñ

dosto gardish-e-hālāt bhī thak jaatī hai

ab añdherā kabhī raste meñ nahīñ aa.egā

ab nazar hadd-e-nazar se pare tak jaatī hai

mere hāthoñ meñ vo sāġhar hai chhalakne vaalā

tā-ba dīvār-e-haram jis kī khanak jaatī hai

aaj us paikar-e-rañgīñ se milā huuñ 'parvāz'

jis ke dāman se fazā saarī mahak jaatī hai

inT diwar se jab koi khisak jati hai

dhup kuchh aur mere sar pe chamak jati hai

kitne darwaze mujhe band nazar aate hain

aankh jab uTh ke sar-e-baam-e-falak jati hai

mujh se is baat pe naraaz hain arbab-e-KHirad

baat aai hui honTon pe aTak jati hai

mutmain ho ke kabhi sans na len ahl-e-chaman

aag sinon mein hawa pa ke bhaDak jati hai

jaane kya baat hai ab rah-e-wafa mein aksar

zindagi apne hi sae se ThiThuk jati hai

ek hamin aabla-pai se gila-mand nahin

dosto gardish-e-haalat bhi thak jati hai

ab andhera kabhi raste mein nahin aaega

ab nazar hadd-e-nazar se pare tak jati hai

mere hathon mein wo saghar hai chhalakne wala

ta-ba diwar-e-haram jis ki khanak jati hai

aaj us paikar-e-rangin se mila hun 'parwaz'

jis ke daman se faza sari mahak jati hai