isa ki qum se hukm nahin kam faqir ka

iisā kī qum se hukm nahīñ kam faqīr kā

arinī pukārtā hai sadā dam faqīr kā

ḳhūbī bharī hai jis meñ do-ālam kī koT koT

allāh ne kiyā hai vo aalam faqīr kā

sab jhuuT hai ki tum ko hamārā ho ġham miyāñ

baabā kise ḳhudā ke sivā ġham faqīr kā

ham kyuuñ na apne-āp ko ro leveñ jīte-jī

ai dost kaun phir kare mātam faqīr kā

mar jāveñ ham to par na ḳhabar ho ye tum ko aah

kyā jaane kab jahāñ se gayā dam faqīr kā

ab ham pe kyā guzartī hai aur kyā guzar ga.ī

kis se kaheñ vo yaar hai mahram faqīr kā

jab jīte-jī kisī ne na pūchhā to mehrbāñ

phir ba.ad-e-marg kis ko rahā ġham faqīr kā

ho kyuuñ na us ko faqr kī bātoñ meñ dast-gāh

hai bālakā 'nazīr' purātam faqīr kā

isa ki qum se hukm nahin kam faqir ka

arini pukarta hai sada dam faqir ka

KHubi bhari hai jis mein do-alam ki koT koT

allah ne kiya hai wo aalam faqir ka

sab jhuT hai ki tum ko hamara ho gham miyan

baba kise KHuda ke siwa gham faqir ka

hum kyun na apne-ap ko ro lewen jite-ji

ai dost kaun phir kare matam faqir ka

mar jawen hum to par na KHabar ho ye tum ko aah

kya jaane kab jahan se gaya dam faqir ka

ab hum pe kya guzarti hai aur kya guzar gai

kis se kahen wo yar hai mahram faqir ka

jab jite-ji kisi ne na puchha to mehrban

phir baad-e-marg kis ko raha gham faqir ka

ho kyun na us ko faqr ki baaton mein dast-gah

hai baalaka 'nazir' puraatam faqir ka