ek aag dekhta tha aur jal raha tha main

ik aag dekhtā thā aur jal rahā thā maiñ

vo shaam aa.ī magar haath mal rahā thā maiñ

ye umr kaise guzārī bas itnā yaad hai ab

udaas raat ke sahrā pe chal rahā thā maiñ

bas ek zid thī so ḳhud ko tabāh kartā rahā

nasīb us ke ki phir bhī sambhal rahā thā maiñ

bharī thī us ne rag-o-pai meñ barf kī ThanDak

so ek barf kī sūrat pighal rahā thā maiñ

ḳhudā-sifat thā vo lamha ki jis meñ gum ho kar

zamīñ se āsmāñ ke dukh badal rahā thā maiñ

maiñ ek ahd thā ik ahd kī alāmat thā

hazār chehroñ meñ din raat Dhal rahā thā maiñ

bas ek abr ke saa.e ne aa liyā mujh ko

azaab oḌh ke ghar se nikal rahā thā maiñ

ek aag dekhta tha aur jal raha tha main

wo sham aai magar hath mal raha tha main

ye umr kaise guzari bas itna yaad hai ab

udas raat ke sahra pe chal raha tha main

bas ek zid thi so KHud ko tabah karta raha

nasib us ke ki phir bhi sambhal raha tha main

bhari thi us ne rag-o-pai mein barf ki ThanDak

so ek barf ki surat pighal raha tha main

KHuda-sifat tha wo lamha ki jis mein gum ho kar

zamin se aasman ke dukh badal raha tha main

main ek ahd tha ek ahd ki alamat tha

hazar chehron mein din raat Dhal raha tha main

bas ek abr ke sae ne aa liya mujh ko

azab oDh ke ghar se nikal raha tha main