اک آگہی کی تپش تھی جو کارگر کر لی

اک آگہی کی تپش تھی جو کارگر کر لی

دہکتے شالوں پہ ہم نے گزر بسر کر لی

غم و الم کی فضا جس نے مشتہر کر لی

غضب کیا کہ یہ تحقیر در بدر کر لی

تمام عمر کی افتاد در گزر کر لی

بہ ذوق و شوق شب زیست کی سحر کر لی

جسے بھی ہونا ہو ہم سے کنارہ کش ہو لے

کہ ہم نے اپنی روش غیر معتبر کر لی

نہ آدمی سے سوا ہم کو پر وقار ملا

کہ سیر دیر و حرم ہم نے عمر بھر کر لی

وہ گمشدہ ہوں کہ دنیا مری تلاش میں ہے

نشاط غم میں الگ اپنی رہ گزر کر لی

ہر ایک فرد کو خود سے بھی معتبر پایا

جب اپنے نامۂ اعمال پر نظر کر لی

چلو تمام ہوا قصۂ نشیب و فراز

زہے نصیب کہ تکمیل درد سر کر لی

یہ بود و باش کہاں اختیار کی حامدؔ

کہ ہم نے اپنی ہی تخلیق بے اثر کر لی