ek aaKHiri umid hun ek rasta hun main

ik āḳhirī umiid huuñ ik rāstā huuñ maiñ

chal kar girā huuñ aur sañbhal kar uThā huuñ maiñ

suntī hai is tarah se mirī zindagī mujhe

TuuTe hue ġhurūr kī bikhrī sadā huuñ maiñ

vābasta is qadar thā maiñ āñgan kī dhuup se

dīvār jab uThā.ī ga.ī gir paḌā huuñ maiñ

kal raat apne ḳhvāb meñ pyāsā hī mar gayā

dariyā tirī talāsh meñ jaañ se gayā huuñ maiñ

ik silsila thā pusht thī ḳhanjar thā vaar thā

hairat-zada haiñ yaar ki ab tak khaḌā huuñ maiñ

mujh ko nikālnī thī ka.ī sūrajoñ kī raah

duniyā samajh na paa.ī ki kyūñkar bujhā huuñ maiñ

haiñ be-asar ye ḳhuun ke dhabbe ye shor-o-ġhul

maiñ huuñ zamīr-e-qaum abhī so rahā huuñ maiñ

dekhā hai maiñ ne ḳhaak bhī sahrā bhī dasht bhī

vahshat tire hudūd se aage gayā huuñ maiñ

vahm-o-gumān vaalo mire paas aao to

mujh se nazar milāo ki ik aa.ina huuñ maiñ

ek aaKHiri umid hun ek rasta hun main

chal kar gira hun aur sanbhal kar uTha hun main

sunti hai is tarah se meri zindagi mujhe

TuTe hue ghurur ki bikhri sada hun main

wabasta is qadar tha main aangan ki dhup se

diwar jab uThai gai gir paDa hun main

kal raat apne KHwab mein pyasa hi mar gaya

dariya teri talash mein jaan se gaya hun main

ek silsila tha pusht thi KHanjar tha war tha

hairat-zada hain yar ki ab tak khaDa hun main

mujh ko nikalni thi kai surajon ki rah

duniya samajh na pai ki kyunkar bujha hun main

hain be-asar ye KHun ke dhabbe ye shor-o-ghul

main hun zamir-e-qaum abhi so raha hun main

dekha hai main ne KHak bhi sahra bhi dasht bhi

wahshat tere hudud se aage gaya hun main

wahm-o-guman walo mere pas aao to

mujh se nazar milao ki ek aaina hun main