اک آرزو ہی سہی آرزو کی عادت ہے

اک آرزو ہی سہی آرزو کی عادت ہے

کہ چشم دل کو اسی خوب رو کی عادت ہے

نہ ڈر اے عشق تو جاری رکھ امتحاں اپنا

جناب دل کو ذرا ہاؤ ہو کی عادت ہے

انہیں سے مجھ کو بھی ہے شوق زخم کھانے کا

لگا کے زخم انہیں بھی رفو کی عادت ہے

میں کیا کروں کہ مری چپ انہیں رکھے مسرور

میں کیا کہوں کہ مجھے گفتگو کی عادت ہے

کہا کہ مجھ کو تری پڑ گئی ہے عادت سی

ملا جواب تجھے فالتو کی عادت ہے

چمن میں پیکر خوشبو ملے کئی عامرؔ

پہ کیا کروں کہ اسی مشکبو کی عادت ہے