ek aarzu hi sahi aarzu ki aadat hai

ik aarzū hī sahī aarzū kī 'ādat hai

ki chashm-e-dil ko usī ḳhūb-rū kī 'ādat hai

na Dar ai 'ishq tū jaarī rakh imtihāñ apnā

janāb-e-dil ko zarā hāo-hū kī 'ādat hai

unhīñ se mujh ko bhī hai shauq zaḳhm khāne kā

lagā ke zaḳhm unheñ bhī rafū kī 'ādat hai

maiñ kyā karūñ ki mirī chup unheñ rakhe masrūr

maiñ kyā kahūñ ki mujhe guftugū kī 'ādat hai

kahā ki mujh ko tirī paḌ ga.ī hai 'ādat sī

milā javāb tujhe fāltū kī 'ādat hai

chaman meñ paikar-e-ḳhushbū mile ka.ī 'āmir'

pa kyā karūñ ki usī mushkbū kī 'ādat hai

ek aarzu hi sahi aarzu ki 'adat hai

ki chashm-e-dil ko usi KHub-ru ki 'adat hai

na Dar ai 'ishq tu jari rakh imtihan apna

janab-e-dil ko zara hao-hu ki 'adat hai

unhin se mujh ko bhi hai shauq zaKHm khane ka

laga ke zaKHm unhen bhi rafu ki 'adat hai

main kya karun ki meri chup unhen rakhe masrur

main kya kahun ki mujhe guftugu ki 'adat hai

kaha ki mujh ko teri paD gai hai 'adat si

mila jawab tujhe faltu ki 'adat hai

chaman mein paikar-e-KHushbu mile kai 'amir'

pa kya karun ki usi mushkbu ki 'adat hai