اک آرزو نظر سے جھلکتی ضرور ہے

اک آرزو نظر سے جھلکتی ضرور ہے

دل کے قریب برق چمکتی ضرور ہے

محتاط چشم شوق رہے لاکھ بزم میں

موج شراب جام چھلکتی ضرور ہے

ہنگامۂ سکوت میں ہے ربط سوز غم

راتوں میں دن کی آگ دہکتی ضرور ہے

زعم شعور کیف انا لطف آگہی

اس بے خودی میں فکر بہکتی ضرور ہے

چلتی ہے جب بھی دل میں ہوا تجربات کی

شاخ گل شعور مہکتی ضرور ہے

سپنوں کے اس کھنڈر میں شب غم کے ساز پر

پرچھائیں سی کسی کی تھرکتی ضرور ہے

سوز جفا تو مانگے ہے شبنم نگاہ کی

ورنہ یہ دھیمی آنچ بھڑکتی ضرور ہے

سنولا نہ جائے چاند تصور کی رات کا

پچھلے کی چاندنی بھی چٹکتی ضرور ہے

چھپتی ہے کب چھپانے سے کوئی کسک کلیمؔ

رنگ غزل سے تیرے جھلکتی ضرور ہے