اک بار دیکھ لوں تو ستاتا ہے آئنہ

اک بار دیکھ لوں تو ستاتا ہے آئنہ

بیتے دنوں کی یاد دلاتا ہے آئنہ

بد صورتی پہ اپنی ترس کیوں نہ آئے گا

جب بار بار کوئی دکھاتا ہے آئنہ

ہر کوئی اس ہنر ث تو واقف نہیں مگر

بد صورتوں کا بوجھ اٹھاتا ہے آئنہ

انساں کی صحبتوں نے اسے بھی سکھا دیا

چہروں پہ خوب چہرے چڑھاتا ہے آئنہ

جو داغ میرے چہرے پہ تھے ہی نہیں کبھی

اکثر وہ داغ مجھ کو دکھاتا ہے آئنہ

سچ پوچھئے تو چہروں پہ لکھا نہیں ہے کچھ

اپنے ہی دل کی بات بتاتا ہے آئنہ

اس وقت کائنات کا عالم نہ پوچھئے

جب پتھروں سے آنکھ ملاتا ہے آئنہ

باطن کی کچھ خبر ہے نہ ظاہر پہ کچھ عیاں

کچھ راز اس طرح بھی چھپاتا ہے آئنہ

محفل میں سب سے آنکھیں چراتا ہے گو ضیاؔ

تنہائیوں میں ساتھ نبھاتا ہے آئنہ