ek bar dekh lun to satata hai aaina

ik baar dekh luuñ to satātā hai aa.ina

biite dinoñ kī yaad dilātā hai aa.ina

bad-sūratī pe apnī taras kyoñ na aa.egā

jab baar baar koī dikhātā hai aa.ina

har koī is hunar se to vāqif nahīñ magar

bad-sūratoñ kā bojh uThātā hai aa.ina

insāñ kī sohbatoñ ne ise bhī sikhā diyā

chehroñ pe ḳhuub chehre chaḌhātā hai aa.ina

jo daaġh mere chehre pe the hī nahīñ kabhī

aksar vo daaġh mujh ko dikhātā hai aa.ina

sach pūchhiye to chehroñ pe likkhā nahīñ hai kuchh

apne hī dil kī baat batātā hai aa.ina

us vaqt kā.enāt kā aalam na pūchhiye

jab pattharoñ se aañkh milātā hai aa.ina

bātin kī kuchh ḳhabar hai na zāhir pe kuchh ayaañ

kuchh raaz is tarah bhī chhupātā hai aa.ina

mahfil meñ sab se āñkheñ churātā hai go 'ziyā'

tanhā.iyoñ meñ saath nibhātā hai aa.ina

ek bar dekh lun to satata hai aaina

bite dinon ki yaad dilata hai aaina

bad-surati pe apni taras kyon na aaega

jab bar bar koi dikhata hai aaina

har koi is hunar se to waqif nahin magar

bad-suraton ka bojh uThata hai aaina

insan ki sohbaton ne ise bhi sikha diya

chehron pe KHub chehre chaDhata hai aaina

jo dagh mere chehre pe the hi nahin kabhi

aksar wo dagh mujh ko dikhata hai aaina

sach puchhiye to chehron pe likkha nahin hai kuchh

apne hi dil ki baat batata hai aaina

us waqt kaenat ka aalam na puchhiye

jab pattharon se aankh milata hai aaina

baatin ki kuchh KHabar hai na zahir pe kuchh ayan

kuchh raaz is tarah bhi chhupata hai aaina

mahfil mein sab se aankhen churaata hai go 'ziya'

tanhaiyon mein sath nibhata hai aaina