ek baat bahut KHas thi chehron ke safar mein

ik baat bahut ḳhaas thī chehroñ ke safar meñ

TuuTe hue ā.īne mile rāhguzar meñ

rahtā huuñ ujāloñ ke añdheroñ ke safar meñ

ye kis ne mujhe baañT diyā shām-o-sahar meñ

dīvāngī-e-shauq kī 'azmat hai nazar meñ

sahrāoñ kī tasvīr lagā rakkhī hai ghar meñ

jab tak ki na aa jā.ūñ maiñ sāhil kī nazar meñ

rahne de mujhe gardish-e-taqdīr bhañvar meñ

aa jaa.e agar baal to miT jaate haiñ jauhar

maiñ rakhtā nahīñ TuuTā huā aa.ina ghar meñ

baḌh jā.egī ai ham-safaro dūrī-e-manzil

guzrī huī bātoñ ko na duhrāo safar meñ

ho pyaar to āsānī se aa saktā hai 'saulat'

jannat kā maza chhoTe se TuuTe hue ghar meñ

ek baat bahut KHas thi chehron ke safar mein

TuTe hue aaine mile rahguzar mein

rahta hun ujalon ke andheron ke safar mein

ye kis ne mujhe banT diya sham-o-sahar mein

diwangi-e-shauq ki 'azmat hai nazar mein

sahraon ki taswir laga rakkhi hai ghar mein

jab tak ki na aa jaun main sahil ki nazar mein

rahne de mujhe gardish-e-taqdir bhanwar mein

aa jae agar baal to miT jate hain jauhar

main rakhta nahin TuTa hua aaina ghar mein

baDh jaegi ai ham-safaro duri-e-manzil

guzri hui baaton ko na duhrao safar mein

ho pyar to aasani se aa sakta hai 'saulat'

jannat ka maza chhoTe se TuTe hue ghar mein