ek baat par bigDe gae na jo umr-bhar mile

ik baat par bigḌe ga.e na jo umr-bhar mile

us se tarīq sulh ke kyā sulh-gar mile

bāham sulūk thā pa tire daur-husn meñ

ye rasm uTh ga.ī ki bashar se bashar mile

dil mahv-e-chashm-e-yār thā bīmār ho gayā

kuchh un parstishoñ kā bhī āḳhir samar mile

ai naala tū ne saath diyā aah kā to kyā

ummīd kyā asar kī jo dū be-asar mile

sadma jigar pe pahuñche to ho dil meñ kyuuñ na dard

kyā farq kuchh judā nahīñ haiñ dil jigar mile

ham ko hamāre tāl-e-bad ne Dubo diyā

achchhe the gar nasīb to kyuuñ chashm-e-tar mile

dho.ūñ sad-āb-e-teġh se ai pamba jo kabhū

dāman se tere dāman dāġh-e-jigar mile

ummīd-e-bū meñ us kī mile yuuñ sabā se ham

jis tarah be-ḳhabar se koī be-ḳhabar mile

jo kuchh na dekhnā thā so vo dekhnā paḌā

us bevafā se pahle the kyā dekh kar mile

dekhe hunar jo apne hī vo jaane us kā kaam

ham ko to aib dekh ke apne hunar mile

mehr-e-jahāñ-faroz dikhā duuñ jabīñ ko maiñ

gar sañg-e-āstāna-e-ḳhairul-bashar mile

milne se us kī ghaTtī hai kyā terī shān-e-husn

'āzurdā' ḳhasta-jāñ bhī mile tū agar mile

ek baat par bigDe gae na jo umr-bhar mile

us se tariq sulh ke kya sulh-gar mile

baham suluk tha pa tere daur-husn mein

ye rasm uTh gai ki bashar se bashar mile

dil mahw-e-chashm-e-yar tha bimar ho gaya

kuchh un parstishon ka bhi aaKHir samar mile

ai nala tu ne sath diya aah ka to kya

ummid kya asar ki jo du be-asar mile

sadma jigar pe pahunche to ho dil mein kyun na dard

kya farq kuchh juda nahin hain dil jigar mile

hum ko hamare tal-e-bad ne Dubo diya

achchhe the gar nasib to kyun chashm-e-tar mile

dhoun sad-ab-e-tegh se ai pamba jo kabhu

daman se tere daman dagh-e-jigar mile

ummid-e-bu mein us ki mile yun saba se hum

jis tarah be-KHabar se koi be-KHabar mile

jo kuchh na dekhna tha so wo dekhna paDa

us bewafa se pahle the kya dekh kar mile

dekhe hunar jo apne hi wo jaane us ka kaam

hum ko to aib dekh ke apne hunar mile

mehr-e-jahan-faroz dikha dun jabin ko main

gar sang-e-astana-e-KHairul-bashar mile

milne se us ki ghaTti hai kya teri shan-e-husn

'azurda' KHasta-jaan bhi mile tu agar mile