اک بدن اک سفر اک گماں اور میں

اک بدن اک سفر اک گماں اور میں

آسماں دور تک بے نشاں اور میں

اڑ گئے رنگ سب اس کی تصویر کے

ایک بے چہرگی ہے عیاں اور میں

ہم سفر ہم ابد سے ازل تک رہے

اک سلگتا ہوا دل دھواں اور میں

سلسلہ درد کا ٹوٹتا ہی نہیں

شب سے دن دن سے شب بے کراں اور میں

ایک شے روشنی ایک شے تیرگی

وسعت خامشی درمیاں اور میں

خاک بیتے دنوں کی سنبھالے ہوئے

ہیں غم لا مکاں رائیگاں اور میں

گردش وقت میراؔ تعاقب میں ہے

رفتہ رفتہ ہے نفس گراں اور میں