ek barq-e-tapan kaudde bijli si chamke jae

ik barq-e-tapāñ kauñde bijlī sī chamke jaa.e

is āriz-e-rañgīñ se parda jo sarak jaa.e

zāhid ho to chhak jaa.e nāseh ho to thak jaa.e

kam-zarf hai vo mai-kash jo pī ke bahak jaa.e

sāvan kī ghaTā uTThe bhādoñ kā samāñ bāñdhe

vo zulf jo bikhrā de māhaul mahak jaa.e

kaliyoñ ke tabassum par tum bhī na kahīñ hañs do

Dar hai ki rag-e-gul meñ kāñTe na khaTak jaa.e

ai jur.at-e-rindāna kuchh tū hī madad farmā

yā un kā hijāb uTThe yā merī jhijhak jaa.e

aa.e bhī to ho jaa.e jazb āñkhoñ hī āñkhoñ meñ

vo ashk nahīñ hai jo palkoñ se Dhalak jaa.e

kyā shai hai ta.alluq bhī kyā chiiz hai nisbat bhī

jab zikr tirā aa.e kāñTā sā khaTak jaa.e

ab sabr-o-tahammul kā ai 'tāj' ḳhudā-hāfiz

paimāna labālab hai dekho na chhalak jaa.e

ek barq-e-tapan kaunde bijli si chamke jae

is aariz-e-rangin se parda jo sarak jae

zahid ho to chhak jae naseh ho to thak jae

kam-zarf hai wo mai-kash jo pi ke bahak jae

sawan ki ghaTa uTThe bhadon ka saman bandhe

wo zulf jo bikhra de mahaul mahak jae

kaliyon ke tabassum par tum bhi na kahin hans do

Dar hai ki rag-e-gul mein kanTe na khaTak jae

ai jurat-e-rindana kuchh tu hi madad farma

ya un ka hijab uTThe ya meri jhijhak jae

aae bhi to ho jae jazb aankhon hi aankhon mein

wo ashk nahin hai jo palkon se Dhalak jae

kya shai hai talluq bhi kya chiz hai nisbat bhi

jab zikr tera aae kanTa sa khaTak jae

ab sabr-o-tahammul ka ai 'taj' KHuda-hafiz

paimana labaalab hai dekho na chhalak jae