ek be-panah raat ka tanha jawab tha

ik be-panāh raat kā tanhā javāb thā

chhoTā sā ik diyā jo sar-e-ehtisāb thā

rasta mirā tazād kī tasvīr ho gayā

dariyā bhī bah rahā thā jahāñ par sarāb thā

vo vaqt bhī ajiib thā hairān kar gayā

vāzeh thā zindagī kī tarah aur ḳhvāb thā

pahle paḌāv se hī use lauTnā paḌā

lambī masāfatoñ se jise ijtināb thā

phir be-numū zamīn thī aur ḳhushk the shajar

be-abr āsmāñ kā chalan kāmyāb thā

ik be-qayās baat se mansūb ho gayā

phailā huā hurūf meñ jo iztirāb thā

apnī nigāh par bhī karūñ e'tibār kyā

kis maan par kahūñ vo mirā intiḳhāb thā

ek be-panah raat ka tanha jawab tha

chhoTa sa ek diya jo sar-e-ehtisab tha

rasta mera tazad ki taswir ho gaya

dariya bhi bah raha tha jahan par sarab tha

wo waqt bhi ajib tha hairan kar gaya

wazeh tha zindagi ki tarah aur KHwab tha

pahle paDaw se hi use lauTna paDa

lambi masafaton se jise ijtinab tha

phir be-numu zamin thi aur KHushk the shajar

be-abr aasman ka chalan kaamyab tha

ek be-qayas baat se mansub ho gaya

phaila hua huruf mein jo iztirab tha

apni nigah par bhi karun e'tibar kya

kis man par kahun wo mera intiKHab tha