ek be-wafa se pyar kiya hae kya kiya

ik be-vafā se pyaar kiyā haa.e kyā kiyā

dushman pe e.atibār kiyā haa.e kyā kiyā

dil ne ba-fart-e-josh-e-junūñ un ke sāmne

har raaz āshkār kiyā haa.e kyā kiyā

ārā.ishoñ se kaam rahā jin ko umr bhar

aisoñ kā intizār kiyā haa.e kyā kiyā

iz.hār-e-dard hijr na thā ham ko kuchh zarūr

us but ko sharmsār kiyā haa.e kyā kiyā

mere junūn-e-shauq ke charche haiñ har kahīñ

dāman bhī taar taar kiyā haa.e kyā kiyā

ab dil hai rasm-o-rāh-e-mohabbat se munharif

fikr-e-ma.āl-e-kār kiyā haa.e kyā kiyā

tāsīr-e-iztirāb se āḳhir vo kah uThe

'premī' ko be-qarār kiyā haa.e kyā kiyā

ek be-wafa se pyar kiya hae kya kiya

dushman pe eatibar kiya hae kya kiya

dil ne ba-fart-e-josh-e-junun un ke samne

har raaz aashkar kiya hae kya kiya

aaraishon se kaam raha jin ko umr bhar

aison ka intizar kiya hae kya kiya

izhaar-e-dard hijr na tha hum ko kuchh zarur

us but ko sharmsar kiya hae kya kiya

mere junun-e-shauq ke charche hain har kahin

daman bhi tar tar kiya hae kya kiya

ab dil hai rasm-o-rah-e-mohabbat se munharif

fikr-e-maal-e-kar kiya hae kya kiya

tasir-e-iztirab se aaKHir wo kah uThe

'premi' ko be-qarar kiya hae kya kiya