ek dafine mein ajab rang ka patthar nikla

ik dafīne meñ ajab rang kā patthar niklā

ġhaur se kī jo nazar us pe to gauhar niklā

jis ne ik markaz-e-ta.alīm diyā hai logo

bas haqīqat meñ vo ik qaum kā rahbar niklā

jo khañDar khodā gayā dekh ke hairat ye huī

shāmil us meñ bhī mire naam kā patthar niklā

sang-dil hai jo zamāne kī nigāhoñ meñ bahut

haañ vahī mere liye merā muqaddar niklā

shahr meñ aayā palaT kar maiñ safar se jis dam

jis ko pahchān na paayā vo mirā ghar niklā

koī tartīb na thī ghar meñ kitāboñ meñ mirī

merā kamra bhī to aḳhbār kā daftar niklā

sab ko taufīq-e-adab hotī hai 'iqbāl' kahāñ

jis ko hāsil huī qismat kā sikandar niklā

ek dafine mein ajab rang ka patthar nikla

ghaur se ki jo nazar us pe to gauhar nikla

jis ne ek markaz-e-talim diya hai logo

bas haqiqat mein wo ek qaum ka rahbar nikla

jo khanDar khoda gaya dekh ke hairat ye hui

shamil us mein bhi mere nam ka patthar nikla

sang-dil hai jo zamane ki nigahon mein bahut

han wahi mere liye mera muqaddar nikla

shahr mein aaya palaT kar main safar se jis dam

jis ko pahchan na paya wo mera ghar nikla

koi tartib na thi ghar mein kitabon mein meri

mera kamra bhi to aKHbar ka daftar nikla

sab ko taufiq-e-adab hoti hai 'iqbaal' kahan

jis ko hasil hui qismat ka sikandar nikla