ek dhuan uTh raha hai aangan se

ik dhuāñ uTh rahā hai āñgan se

haiñ abhī kuchh charāġh raushan se

is meñ shāmil hai bū-e-aflākī

ye havā aa rahī hai kis ban se

dene aayā huuñ fat.h kā muzhda

bhaag aayā nahīñ huuñ maiñ ran se

manziloñ kī bhī aarzū hai bahut

Dar bhī lagtā hai mujh ko ran-ban se

ab bhī kyā raat ke añdhere meñ

sho'la uThtā hai gulshan-e-tan se

surḳh-rū 'ishq kī badaulat huuñ

ki maiñ is aag meñ huuñ bachpan se

ye zamāna hai chāplūsī kā

ham to vāqif nahīñ isī fan se

mujh se pahchān terī qaa.em hai

maiñ tumheñ chāhtā huuñ tan-man se

ek dhuan uTh raha hai aangan se

hain abhi kuchh charagh raushan se

is mein shamil hai bu-e-aflaki

ye hawa aa rahi hai kis ban se

dene aaya hun fath ka muzhda

bhag aaya nahin hun main ran se

manzilon ki bhi aarzu hai bahut

Dar bhi lagta hai mujh ko ran-ban se

ab bhi kya raat ke andhere mein

sho'la uThta hai gulshan-e-tan se

surKH-ru 'ishq ki badaulat hun

ki main is aag mein hun bachpan se

ye zamana hai chaplusi ka

hum to waqif nahin isi fan se

mujh se pahchan teri qaem hai

main tumhein chahta hun tan-man se