اک دن دکھ کی شدت کم پڑ جاتی ہے

اک دن دکھ کی شدت کم پڑ جاتی ہے

کیسی بھی ہو وحشت کم پڑ جاتی ہے

زندہ رہنے کا نشہ ہی ایسا ہے

جتنی بھی ہو مدت کم پڑ جاتی ہے

اپنے آپ سے ملتا ہوں میں فرصت میں

اور پھر مجھ کو فرصت کم پڑ جاتی ہے

صحرا میں آ نکلے تو معلوم ہوا

تنہائی کو وسعت کم پڑ جاتی ہے

کچھ ایسی بھی دل کی باتیں ہوتی ہیں

جن باتوں کو خلوت کم پڑ جاتی ہے

اک دن یوں ہوتا ہے خوش رہتے رہتے

خوش رہنے کی عادت کم پڑ جاتی ہے

کاشف غائرؔ دل کا قرض چکانے میں

دنیا بھر کی دولت کم پڑ جاتی ہے