اک دن تمام فرض ادا کر دئے گئے

اک دن تمام فرض ادا کر دئے گئے

سارے اسیر ذات رہا کر دئے گئے

دو چار غم گسار ہمارے تھے شہر میں

سنتے ہیں اب کہ وہ بھی خدا کر دئے گئے

وہ فرقتوں کے دن تھے کہ تھا موسم وصال

کتنے ہی زخم دل کو کما کر دئے گئے

شام سیہ بس اپنا سا منہ لے کے رہ گئی

سارے چراغ نذر ہوا کر دئے گئے

کچھ غم نصیب عشق تھے کچھ غم نصیب زیست

کچھ غم مزاج دل پہ عطا کر دئے گئے

درکار ہو گیا تھا کہانی میں کچھ نیا

ہم لوگ اس لئے بھی جدا کر دئے گئے

اس کا حسین چہرہ بنانے کی ضد تھی اور

آنکھوں کے سارے رنگ فنا کر دئے گئے

کچھ روز میں ہی ہو گئے جب خوگر قفس

چپکے سے سب پرندے رہا کر دئے گئے