ek din tamam farz ada kar diye gae

ik din tamām farz adā kar diye ga.e

saare asīr-e-zāt rihā kar diye ga.e

do chaar ġham-gusār hamāre the shahr meñ

sunte haiñ ab ki vo bhī ḳhudā kar diye ga.e

vo furqatoñ ke din the ki thā mausam-e-visāl

kitne hī zaḳhm dil ko kamā kar diye ga.e

shām-e-siyah bas apnā sā muñh le ke rah ga.ī

saare charāġh nazr-e-havā kar diye ga.e

kuchh ġham nasīb-e-'ishq the kuchh ġham nasīb-e-zīst

kuchh ġham mizāj-e-dil pe 'atā kar diye ga.e

darkār ho gayā thā kahānī meñ kuchh nayā

ham log is liye bhī judā kar diye ga.e

us kā hasīn chehra banāne kī zid thī aur

āñkhoñ ke saare rang fanā kar diye ga.e

kuchh roz meñ hī ho ga.e jab ḳhūgar-e-qafas

chupke se sab parinde rihā kar diye ga.e

ek din tamam farz ada kar diye gae

sare asir-e-zat riha kar diye gae

do chaar gham-gusar hamare the shahr mein

sunte hain ab ki wo bhi KHuda kar diye gae

wo furqaton ke din the ki tha mausam-e-visal

kitne hi zaKHm dil ko kama kar diye gae

sham-e-siyah bas apna sa munh le ke rah gai

sare charagh nazr-e-hawa kar diye gae

kuchh gham nasib-e-'ishq the kuchh gham nasib-e-zist

kuchh gham mizaj-e-dil pe 'ata kar diye gae

darkar ho gaya tha kahani mein kuchh naya

hum log is liye bhi juda kar diye gae

us ka hasin chehra banane ki zid thi aur

aankhon ke sare rang fana kar diye gae

kuchh roz mein hi ho gae jab KHugar-e-qafas

chupke se sab parinde riha kar diye gae