اک دیا آنکھ کے مقابل ہو

اک دیا آنکھ کے مقابل ہو

روشنی تیرگی کا حاصل ہو

جو مسیحائی کر رہا ہے ابھی

عین ممکن ہے دست قاتل ہو

تم حسیں ہو مگر ضروری نہیں

ہر کوئی حسن ہی سے قائل ہو

بعض رستے طویل ہوتے ہیں

انت لازم نہیں کہ منزل ہو

در پہ آیا ہے تو فلا تنھر

کیا خبر رب کا بھیجا سائل ہو

یہ فقط عشق کے مراتب ہیں

خلد میں حبشی پہلے داخل ہو

آنکھ میں عکس ڈھونڈنے والے

بحر کا لازمی ہے ساحل ہو

حق معظم ہے اس لیے علویؔ

سامنے جو بھی آئے باطل ہو