ek diya jal raha hai hawa tez hai

ik diyā jal rahā hai havā tez hai

dil magar kāñptā hai havā tez hai

'ārizoñ ke par pankh kyā ho ga.e

shauq mahv-e-duā hai havā tez hai

ek jhoñke meñ ḳhushbū kahāñ uḌ ga.ī

kaun sā gul khilā hai havā tez hai

dasht-dar-dasht uḌtī huī ḳhaak meñ

zindagī lāpata hai havā tez hai

kah rahī haiñ samundar kī ḳhāmoshiyāñ

mere siine meñ kyā hai havā tez hai

mast hāthī se bādal kahāñ kho ga.e

chiyuñTiyoñ sī ghaTā hai havā tez hai

kaun rotā hai vaqt-e-sahar dil dukhā

ik sisaktī sadā hai havā tez hai

kyā vo aayā ki zanjīr hilne lagī

yā mirā vāhima hai havā tez hai

is bulandī se guzre to aisā lagā

kyā khulī sī fazā hai havā tez hai

ham kahāñ jā rahe haiñ zamīñ chhoḌ kar

ye safar kaun sā hai havā tez hai

ek diya jal raha hai hawa tez hai

dil magar kanpta hai hawa tez hai

'arizon ke par pankh kya ho gae

shauq mahw-e-dua hai hawa tez hai

ek jhonke mein KHushbu kahan uD gai

kaun sa gul khila hai hawa tez hai

dasht-dar-dasht uDti hui KHak mein

zindagi lapata hai hawa tez hai

kah rahi hain samundar ki KHamoshiyan

mere sine mein kya hai hawa tez hai

mast hathi se baadal kahan kho gae

chiyunTiyon si ghaTa hai hawa tez hai

kaun rota hai waqt-e-sahar dil dukha

ek sisakti sada hai hawa tez hai

kya wo aaya ki zanjir hilne lagi

ya mera wahima hai hawa tez hai

is bulandi se guzre to aisa laga

kya khuli si faza hai hawa tez hai

hum kahan ja rahe hain zamin chhoD kar

ye safar kaun sa hai hawa tez hai