ek diye ki lau kaf-e-sad-aina chamka gai

ik diye kī lau kaf-e-sad-ā.īna chamkā ga.ī

raushnī kī ik kiran mahtāb ko sharmā ga.ī

haath maltā din kisī ummīd par muntaj huā

ḳhastagī baḌhtī huī dīvār-e-shab tak aa ga.ī

ashk-shoī ke liye terī himāyat chāhiye

dekh terī ham-subūī meñ ye naubat aa ga.ī

uzr-ḳhvāhāna nigāheñ harf chuntī rah ga.iiñ

bāz-pursāñ ḳhāmushī apnī kahī manvā ga.ī

kab talak ye ālam-e-dil-bastagī dil-ḳhastagī

dhaḌkanoñ ko ye mashaqqat ho na ho raas aa ga.ī

shab tirī tasvīr kā bosa liyā aur yak-ba-yak

ik namī sī thī ki aks-o-ā.ina dhuñdlā ga.ī

dil kī hālat ko agar ta.abīr kiije ishq se

manziloñ ke pher meñ phir fahm dhokā khā ga.ī

shā.irī sharmā rahī hai aaj us ko dekh kar

zindagī ik ḳhūbsūrat aadmī ko khā ga.ī

ye nahīñ rahne kī jaa.e chashm-e-hairāñ yaañ se chal

darshanī jalvoñ kī bastī meñ nazar chuñdhiyā ga.ī

ek diye ki lau kaf-e-sad-aina chamka gai

raushni ki ek kiran mahtab ko sharma gai

hath malta din kisi ummid par muntaj hua

KHastagi baDhti hui diwar-e-shab tak aa gai

ashk-shoi ke liye teri himayat chahiye

dekh teri ham-subui mein ye naubat aa gai

uzr-KHwahana nigahen harf chunti rah gain

baz-pursan KHamushi apni kahi manwa gai

kab talak ye aalam-e-dil-bastagi dil-KHastagi

dhaDkanon ko ye mashaqqat ho na ho ras aa gai

shab teri taswir ka bosa liya aur yak-ba-yak

ek nami si thi ki aks-o-aina dhundla gai

dil ki haalat ko agar tabir kije ishq se

manzilon ke pher mein phir fahm dhoka kha gai

shairi sharma rahi hai aaj us ko dekh kar

zindagi ek KHubsurat aadmi ko kha gai

ye nahin rahne ki jae chashm-e-hairan yan se chal

darshani jalwon ki basti mein nazar chundhiya gai