ek do qadam hi sath chale bhi to kya chale

ik do qadam hī saath chale bhī to kyā chale

tā-'umr saath do to vafā kā pata chale

vaqt-e-sahar nazar jo paḌī sū-e-razm-gāh

dā'vā vafā kā thā jinheñ ḳheme uThā chale

aisā charāġh jis pe ḳhudā mehrbān ho

kyā bujh sakegā laakh muḳhālif havā chale

thī ik matā’-e-zīst magar un kī bazm meñ

kyā ḳhuub aa.e dekhiye vo bhī luTā chale

maqtal kī aabrū the vahī log shādbāsh

teġh-e-razā-e-yār se jo sar kaTā chale

zulmat-kadoñ meñ dahr ke jab thī na koī aas

tab saath saath mere tire naqsh-e-pā chale

tere ḳhayāl se hai munavvar siyāh shab

varna to raushnī kā kise kyā pata chale

‘bechain’ maiñ huuñ rāh-e-fanā kā vo rāh-rau

tā.īd jis ke qadmoñ kī kartī baqā chale

ek do qadam hi sath chale bhi to kya chale

ta-'umr sath do to wafa ka pata chale

waqt-e-sahar nazar jo paDi su-e-razm-gah

da'wa wafa ka tha jinhen KHeme uTha chale

aisa charagh jis pe KHuda mehrban ho

kya bujh sakega lakh muKHalif hawa chale

thi ek mata’-e-zist magar un ki bazm mein

kya KHub aae dekhiye wo bhi luTa chale

maqtal ki aabru the wahi log shadbash

tegh-e-raza-e-yar se jo sar kaTa chale

zulmat-kadon mein dahr ke jab thi na koi aas

tab sath sath mere tere naqsh-e-pa chale

tere KHayal se hai munawwar siyah shab

warna to raushni ka kise kya pata chale

‘bechain’ main hun rah-e-fana ka wo rah-rau

taid jis ke qadmon ki karti baqa chale