ek duje ko der se samjha der se yari ki

ik duuje ko der se samjhā der se yaarī kī

ham donoñ ne ek mohabbat baarī baarī kī

ḳhud par hañsne vāloñ meñ ham ḳhud bhī shāmil the

ham ne bhī jī bhar kar apnī dil-āzārī kī

ik aañsū ne dho Daalī hai dil kī saarī mail

ek diye ne kaaT ke rakh dī gahrī tārīkī

dil ne ḳhud isrār kyā ik mumkina hijrat par

ham ne is majbūrī meñ bhī ḳhud-muḳhtārī kī

chauda baras ke hijr ko im-shab ruḳhsat karnā hai

saarā din so so kar jāgne kī tayyārī kī

ham bhī isī duniyā ke baasī the so ham ne bhī

duniyā vāloñ se thoḌī sī duniyā-dārī kī

'anjum' ham ushshāq meñ ūñchā darja rakhte haiñ

be-shak ishq ne aisī koī sanad na jaarī kī

ek duje ko der se samjha der se yari ki

hum donon ne ek mohabbat bari bari ki

KHud par hansne walon mein hum KHud bhi shamil the

hum ne bhi ji bhar kar apni dil-azari ki

ek aansu ne dho Dali hai dil ki sari mail

ek diye ne kaT ke rakh di gahri tariki

dil ne KHud israr kya ek mumkina hijrat par

hum ne is majburi mein bhi KHud-muKHtari ki

chauda baras ke hijr ko im-shab ruKHsat karna hai

sara din so so kar jagne ki tayyari ki

hum bhi isi duniya ke basi the so hum ne bhi

duniya walon se thoDi si duniya-dari ki

'anjum' hum ushshaq mein uncha darja rakhte hain

be-shak ishq ne aisi koi sanad na jari ki