ek ek lafz mein kai pahlu kahan se aae

ik ek lafz meñ ka.ī pahlū kahāñ se aa.e

jānāñ tire suḳhan meñ ye jaadū kahāñ se aa.e

jab tīrgī meñ chāñd sitāre bhī gum hue

palkoñ ke shāmiyāne meñ jugnū kahāñ se aa.e

suljhā rahā thā pech-o-ḳham-e-zindagī magar

hāthoñ meñ yak-ba-yak tire gesū kahāñ se aa.e

shikva nahīñ hai tujh se ki is rahguzār meñ

saa.e na saath aa.e to phir tū kahāñ se aa.e

uljhan tamām umr yahī thī ki ziist meñ

aa.e kahāñ se rañg ki ḳhushbū kahāñ se aa.e

sahrā kī tarah ḳhushk thī phir us ke lams se

be-iḳhtiyār aañkh meñ aañsū kahāñ se aa.e

ek ek lafz mein kai pahlu kahan se aae

jaanan tere suKHan mein ye jadu kahan se aae

jab tirgi mein chand sitare bhi gum hue

palkon ke shamiyane mein jugnu kahan se aae

suljha raha tha pech-o-KHam-e-zindagi magar

hathon mein yak-ba-yak tere gesu kahan se aae

shikwa nahin hai tujh se ki is rahguzar mein

sae na sath aae to phir tu kahan se aae

uljhan tamam umr yahi thi ki zist mein

aae kahan se rang ki KHushbu kahan se aae

sahra ki tarah KHushk thi phir us ke lams se

be-iKHtiyar aankh mein aansu kahan se aae