اک فسانہ ہے خواب ہے دنیا

اک فسانہ ہے خواب ہے دنیا

سر بہ سر اک سراب ہے دنیا

حادثوں کا نصاب ہے دنیا

زندگی کی کتاب ہے دنیا

اس کو تشبیہ دیں تو دیں کس سے

خود ہی اپنا جواب ہے دنیا

فیصلہ عمر بھر نہیں ہوتا

خوب ہے یا خراب ہے دنیا

ہے یہ عشرت کدہ کسی کے لئے

اور کسی کو عذاب ہے دنیا

چین انسان کو نہیں پل بھر

عالم اضطراب ہے دنیا

جس کی ہوتی نہیں کوئی تعبیر

وہ سہانا سا خواب ہے دنیا

اس کا جو غم ہے لا جواب ہے شاذؔ

وہ غم بے حساب ہے دنیا