ek haqiqat ki jhalak yun to har andaz mein hai

ik haqīqat kī jhalak yuuñ to har andāz meñ hai

phir haqīqat jise kahte haiñ abhī raaz meñ hai

sāz-bāz ahl-e-nazar jalva-gah-e-nāz meñ hai

ik ishāra hai jo chashm-e-ġhalat-andāz meñ hai

rāzdārī ġham-e-ulfat kī musībat hai use

ik mirī aag kā sho.ala dil-e-hamrāz meñ hai

duur hai duur abhī hāsil-e-duniyā-e-hayāt

fikr-e-anjām tujhe manzil-e-āġhāz meñ hai

chashm-e-pur-fan bhī dil-ārā hai lab-e-nāzuk bhī

sehr meñ bhī hai vahī baat jo e.ajāz meñ hai

jis ne jī bhar ke tajallī ko kabhī dekhā ho

koī aisā bhī tirī jalva-gah-e-nāz meñ hai

daulat-e-sabr-o-tavakkul meñ hai e.azāz-e-bashar

kuchh na daulat hī meñ rakkhā hai na e.azāz meñ hai

dil hilā dene kā andāz gayā ai 'ḳhushtar'

dard pahlā sā kahāñ ab tirī āvāz meñ hai

ek haqiqat ki jhalak yun to har andaz mein hai

phir haqiqat jise kahte hain abhi raaz mein hai

saz-baz ahl-e-nazar jalwa-gah-e-naz mein hai

ek ishaara hai jo chashm-e-ghalat-andaz mein hai

raazdari gham-e-ulfat ki musibat hai use

ek meri aag ka shoala dil-e-hamraaz mein hai

dur hai dur abhi hasil-e-duniya-e-hayat

fikr-e-anjam tujhe manzil-e-aghaz mein hai

chashm-e-pur-fan bhi dil-ara hai lab-e-nazuk bhi

sehr mein bhi hai wahi baat jo eajaz mein hai

jis ne ji bhar ke tajalli ko kabhi dekha ho

koi aisa bhi teri jalwa-gah-e-naz mein hai

daulat-e-sabr-o-tawakkul mein hai eazaz-e-bashar

kuchh na daulat hi mein rakkha hai na eazaz mein hai

dil hila dene ka andaz gaya ai 'KHushtar'

dard pahla sa kahan ab teri aawaz mein hai