اک حقیقت کی جھلک یوں تو ہر انداز میں ہے

اک حقیقت کی جھلک یوں تو ہر انداز میں ہے

پھر حقیقت جسے کہتے ہیں ابھی راز میں ہے

ساز باز اہل نظر جلوہ گہہ ناز میں ہے

اک اشارہ ہے جو چشم غلط انداز میں ہے

رازداری غم الفت کی مصیبت ہے اسے

اک مری آگ کا شعلہ دل ہم راز میں ہے

دور ہے دور ابھی حاصل دنیائے حیات

فکر انجام تجھے منزل آغاز میں ہے

چشم پر فن بھی دل آرا ہے لب نازک بھی

سحر میں بھی ہے وہی بات جو اعجاز میں ہے

جس نے جی بھر کے تجلی کو کبھی دیکھا ہو

کوئی ایسا بھی تری جلوہ گہہ ناز میں ہے

دولت صبر و توکل میں ہے اعزاز بشر

کچھ نہ دولت ہی میں رکھا ہے نہ اعزاز میں ہے

دل ہلا دینے کا انداز گیا اے خوشترؔ

درد پہلا سا کہاں اب تری آواز میں ہے