ek hujum-e-girya ki har nazar tamashai

ik hujūm-e-girya kī har nazar tamāshā.ī

der se ḳharāboñ meñ hai asiir tanhā.ī

dil kī shaam kī sūrat zaḳhm zaḳhm sannāTā

jaañ ki shor-e-vahshat meñ sub.h kī tamannā.ī

kākul-e-ḳhizāñ tere be-sabab ulajhne se

chehra-e-bahārāñ par dekh tīrgī chhā.ī

thī tirī nigāhoñ ke sail-e-tīrgī meñ gum

kab tire ujāle meñ ḳhud ko maiñ nazar aa.ī

qurb thā ki ā.īna jaañ talak bulātā thā

hijr ne bhulā dī hai sūrat-e-shanāsā.ī

bāb-e-rañg ġhunchoñ ke pairahan pe vā kar ke

khil rahī hai shāḳhoñ par dard kī pazīrā.ī

ḳhush huuñ ik sitāre par dekh kar makāñ apnā

raat merī bīnā.ī kaun sī nazar laa.ī

ek hujum-e-girya ki har nazar tamashai

der se KHarabon mein hai asir tanhai

dil ki sham ki surat zaKHm zaKHm sannaTa

jaan ki shor-e-wahshat mein subh ki tamannai

kakul-e-KHizan tere be-sabab ulajhne se

chehra-e-bahaaran par dekh tirgi chhai

thi teri nigahon ke sail-e-tirgi mein gum

kab tere ujale mein KHud ko main nazar aai

qurb tha ki aaina jaan talak bulata tha

hijr ne bhula di hai surat-e-shanasai

bab-e-rang ghunchon ke pairahan pe wa kar ke

khil rahi hai shaKHon par dard ki pazirai

KHush hun ek sitare par dekh kar makan apna

raat meri binai kaun si nazar lai