ek husn-e-kaamyab hai mausam basant ka

ik husn-e-kāmyāb hai mausam basant kā

'ishrat se bāryāb hai mausam basant kā

naġhma-sarā rabāb hai mausam basant kā

bedārī-e-shabāb hai mausam basant kā

dil-dāda-e-sharāb hai mausam basant kā

paimāna-e-savāb hai mausam basant kā

sab mausamoñ kī aab hai mausam basant kā

vallāh āftāb hai mausam basant kā

sonā bichhā huā hai har ik sabza-zār par

tasvīr-e-inqilāb hai mausam basant kā

har chiiz par ubhār hai har shakl par nikhār

umDā huā shabāb hai mausam basant kā

sarsoñ kī aabrū pe zamāne kī hai nazar

qismat kā lā-javāb hai mausam basant kā

rangīniyoñ meñ is kī mohabbat kī hai jhalak

tasvīr-e-be-hijāb hai mausam basant kā

har zindagī pe chhā.ī huī be-ḳhudī sī hai

bikhrī huī sharāb hai mausam basant kā

dāman meñ jis ke phūltī phaltī hai aarzū

vo husn-e-shoḳh-o-shāb hai mausam basant kā

kyā manzar-e-hasīñ hai ki dil shaad 'shād' hai

jāgīr-e-iztirāb hai mausam basant kā

ek husn-e-kaamyab hai mausam basant ka

'ishrat se baryab hai mausam basant ka

naghma-sara rabab hai mausam basant ka

bedari-e-shabab hai mausam basant ka

dil-dada-e-sharab hai mausam basant ka

paimana-e-sawab hai mausam basant ka

sab mausamon ki aab hai mausam basant ka

wallah aaftab hai mausam basant ka

sona bichha hua hai har ek sabza-zar par

taswir-e-inqilab hai mausam basant ka

har chiz par ubhaar hai har shakl par nikhaar

umDa hua shabab hai mausam basant ka

sarson ki aabru pe zamane ki hai nazar

qismat ka la-jawab hai mausam basant ka

ranginiyon mein is ki mohabbat ki hai jhalak

taswir-e-be-hijab hai mausam basant ka

har zindagi pe chhai hui be-KHudi si hai

bikhri hui sharab hai mausam basant ka

daman mein jis ke phulti phalti hai aarzu

wo husn-e-shoKH-o-shab hai mausam basant ka

kya manzar-e-hasin hai ki dil shad 'shad' hai

jagir-e-iztirab hai mausam basant ka