ek huk si dil mein uThti hai aur ashk-fishani hoti hai

ik huuk sī dil meñ uThtī hai aur ashk-fishānī hotī hai

yaad un kī satāne aatī hai jab raat suhānī hotī hai

ye sozish-e-ġham ye dard-o-alam in.ām-e-mohabbat kyā kahiye

ik daaġh hī par mauqūf hai kyā har chiiz nishānī hotī hai

lahrātā rahe gar sho.ala-e-ġham to husn kā dāman bach na sake

ādāb-e-mohabbat kī ḳhātir ye aag bhī paanī hotī hai

thī sāmne hī kī baat magar ye bhed abhī tak khul na sakā

kyoñ rog lagā kar ulfat kā maġhmūm javānī hotī hai

us raah meñ ye arbāb-e-havas saath ahl-e-vafā kā kyā dete

jis raah meñ sirf armān nahīñ hastī bhī miTānī hotī hai

mai-ḳhāna-e-ulfat kī bāteñ nā-ahl-e-mohabbat kyā jāneñ

matvālī nazar kī gardish bhī dilchasp kahānī hotī hai

'navvāb' vo chāhe husn kī ho daulat hai bahar-sūrat daulat

daulat ko jahāñ meñ qiyām kahāñ ye aanī jaanī hotī hai

ek huk si dil mein uThti hai aur ashk-fishani hoti hai

yaad un ki satane aati hai jab raat suhani hoti hai

ye sozish-e-gham ye dard-o-alam inam-e-mohabbat kya kahiye

ek dagh hi par mauquf hai kya har chiz nishani hoti hai

lahraata rahe gar shoala-e-gham to husn ka daman bach na sake

aadab-e-mohabbat ki KHatir ye aag bhi pani hoti hai

thi samne hi ki baat magar ye bhed abhi tak khul na saka

kyon rog laga kar ulfat ka maghmum jawani hoti hai

us rah mein ye arbab-e-hawas sath ahl-e-wafa ka kya dete

jis rah mein sirf arman nahin hasti bhi miTani hoti hai

mai-KHana-e-ulfat ki baaten na-ahl-e-mohabbat kya jaanen

matwali nazar ki gardish bhi dilchasp kahani hoti hai

'nawwab' wo chahe husn ki ho daulat hai bahar-surat daulat

daulat ko jahan mein qiyam kahan ye aani jaani hoti hai