ek ishq hai ki jis ki gali ja raha hun main

ik ishq hai ki jis kī galī jā rahā huuñ maiñ

aur dil kī dhaḌkanoñ se bhī ghabrā rahā huuñ maiñ

kar degā vo muaaf mire har gunāh ko

ye soch kar gunāh kiye jā rahā huuñ maiñ

chhoḌā kahīñ kā mujh ko na duniyā ke dard ne

phir bhī tirā karam ki jiye jā rahā huuñ maiñ

rāh-e-vafā meñ miT ga.e jab fāsle sabhī

phir kyuuñ nigāh-e-yār se sharmā rahā huuñ maiñ

phir ho rahī haiñ pyaar kī sab hasrateñ javāñ

phir dil usī kī yaad se bahlā rahā huuñ maiñ

ik din chukā hī dūñgā zamāne kā bhī hisāb

kuchh baat hai jo zabt kiye jā rahā huuñ maiñ

ulfat kī raah par tujhe mil jā.egā ḳhudā

is be-qarār dil ko ye samjhā rahā huuñ maiñ

vo shoḳh ik nigāh meñ sab saaf kah gayā

muddat se jis ko kahne se katrā rahā huuñ maiñ

'āzim' yaqīñ nahīñ use kyuuñ merī baat par

kyā kam hai ye ki us kī qasam khā rahā huuñ maiñ

ek ishq hai ki jis ki gali ja raha hun main

aur dil ki dhaDkanon se bhi ghabra raha hun main

kar dega wo muaf mere har gunah ko

ye soch kar gunah kiye ja raha hun main

chhoDa kahin ka mujh ko na duniya ke dard ne

phir bhi tera karam ki jiye ja raha hun main

rah-e-wafa mein miT gae jab fasle sabhi

phir kyun nigah-e-yar se sharma raha hun main

phir ho rahi hain pyar ki sab hasraten jawan

phir dil usi ki yaad se bahla raha hun main

ek din chuka hi dunga zamane ka bhi hisab

kuchh baat hai jo zabt kiye ja raha hun main

ulfat ki rah par tujhe mil jaega KHuda

is be-qarar dil ko ye samjha raha hun main

wo shoKH ek nigah mein sab saf kah gaya

muddat se jis ko kahne se katra raha hun main

'azim' yaqin nahin use kyun meri baat par

kya kam hai ye ki us ki qasam kha raha hun main