ek jafa-kar ko dil-dar samajh baiThe the

ik jafā-kār ko dil-dār samajh baiThe the

dushman-e-jāñ thā jise yaar samajh baiThe the

jis sitamgar ne mujhe apnā nahīñ samjhā thā

us ko merā sabhī aġhyār samajh baiThe the

hijr kī raat kaTī chāñd ko takte takte

chāñd ko yaar kā ruḳhsār samajh baiThe the

muddatoñ baa'd kiyā us ne mohabbat ko qubūl

ham to tāḳhīr ko inkār samajh baiThe the

vasl kī sub.h the ham 'ālam-e-mad.hoshī meñ

duniyā vaale hameñ mai-ḳhvār samajh baiThe the

pīr-o-mullā ne tire ghar ko hai mil kar luuTā

jubba dastār ko kirdār samajh baiThe the

hashr ke roz thā ā'māl se daftar ḳhālī

ziist ko dirham-o-dīnār samajh baiThe the

ābla-pā.ī milī dasht-e-mohabbat meñ 'sahāb'

rāh-e-pur-ḳhār ko gulzār samajh baiThe the

daad kyā miltī unheñ bazm-e-suḳhan meñ ai 'sahāb'

uljhe afkār ko ash'ār samajh baiThe the

ek jafa-kar ko dil-dar samajh baiThe the

dushman-e-jaan tha jise yar samajh baiThe the

jis sitamgar ne mujhe apna nahin samjha tha

us ko mera sabhi aghyar samajh baiThe the

hijr ki raat kaTi chand ko takte takte

chand ko yar ka ruKHsar samajh baiThe the

muddaton ba'd kiya us ne mohabbat ko qubul

hum to taKHir ko inkar samajh baiThe the

wasl ki subh the hum 'alam-e-madhoshi mein

duniya wale hamein mai-KHwar samajh baiThe the

pir-o-mulla ne tere ghar ko hai mil kar luTa

jubba dastar ko kirdar samajh baiThe the

hashr ke roz tha aa'mal se daftar KHali

zist ko dirham-o-dinar samajh baiThe the

aabla-pai mili dasht-e-mohabbat mein 'sahab'

rah-e-pur-KHar ko gulzar samajh baiThe the

dad kya milti unhen bazm-e-suKHan mein ai 'sahab'

uljhe afkar ko ash'ar samajh baiThe the