ek jalwa-e-naz par miTa hun

ik jalva-e-nāz par miTā huuñ

maiñ dīda-e-hairat āshnā huuñ

yaktā.ī tirī miTā rahī hai

goyā ki maiñ naqsh-e-mā-sivā huuñ

jalve haiñ ḳhudī ke yaañ nazar meñ

ye aa.ina maiñ bhī dekhtā huuñ

maiḳhāne meñ tark-e-mai kā hai dhyān

ai shaiḳh maiñ rind-e-pārsā huuñ

kyoñ mujh ko miTā rahī hai ai yaas

kyā maiñ koī naqsh-e-mudda.ā huuñ

hastī ne judā kiyā hai tujh se

huuñ naqsh-e-qadam ki rah gayā huuñ

ḳhurshīd nihāñ hai gar ziyā meñ

maiñ jalva-e-yār meñ chhupā huuñ

ek jalwa-e-naz par miTa hun

main dida-e-hairat aashna hun

yaktai teri miTa rahi hai

goya ki main naqsh-e-ma-siwa hun

jalwe hain KHudi ke yan nazar mein

ye aaina main bhi dekhta hun

maiKHane mein tark-e-mai ka hai dhyan

ai shaiKH main rind-e-parsa hun

kyon mujh ko miTa rahi hai ai yas

kya main koi naqsh-e-muddaa hun

hasti ne juda kiya hai tujh se

hun naqsh-e-qadam ki rah gaya hun

KHurshid nihan hai gar ziya mein

main jalwa-e-yar mein chhupa hun