ek KHak-zada chalne laga la-ilah ki samt

ik ḳhāk-zāda chalne lagā lā-ilāh kī samt

ya.anī ki gāmzan maiñ huā karbalā kī samt

mujh ko kisī tabīb se koī ġharaz nahīñ

bīmār paḌ ke aatā huuñ ḳhāk-e-shifā kī samt

jab muntazir the hur ke vahāñ par husain ḳhud

kaise fanā se aatā na phir hur baqā kī samt

karb-o-balā meñ jaatā huuñ āñkhoñ meñ nam liye

na.ara lagā ke jaatā huuñ mushkil-kushā kī samt

maulā tumhārā ġham bhī manāne ko ye malak

arsh-e-barīñ se aate haiñ farsh-e-azā kī samt

kaise bhalā na ro.eñ use dekh kar husain

ġhāzī sā sher bhaa.ī chalā alqamā kī samt

dekho ġhazal se martaba is kā buland hai

chhoḌo ġhazal ko aao 'sahar' marsiya kī samt

ek KHak-zada chalne laga la-ilah ki samt

yani ki gamzan main hua karbala ki samt

mujh ko kisi tabib se koi gharaz nahin

bimar paD ke aata hun KHak-e-shifa ki samt

jab muntazir the hur ke wahan par husain KHud

kaise fana se aata na phir hur baqa ki samt

karb-o-bala mein jata hun aankhon mein nam liye

nara laga ke jata hun mushkil-kusha ki samt

maula tumhaara gham bhi manane ko ye malak

arsh-e-barin se aate hain farsh-e-aza ki samt

kaise bhala na roen use dekh kar husain

ghazi sa sher bhai chala alqama ki samt

dekho ghazal se martaba is ka buland hai

chhoDo ghazal ko aao 'sahar' marsiya ki samt