ek khula maidan tamasha-gah ke us par hai

ik khulā maidāñ tamāshā-gāh ke us paar hai

jis meñ har raqqās kā ik aa.ina tayyār hai

ret ke zariye hamārī manzileñ aur un kī ham

pas yahāñ samt-e-safar kā jānñā be-kār hai

raat aur tūfān-e-abr-o-bād mere har taraf

duur lau detī huī ik mash.al-e-ruḳhsār hai

phir kabhī uTThe to mil leñge na itne dukh uThā

maut se hotā huā ik rāsta hamvār hai

is tarah bāb-e-nasīhat khol kar baiThe haiñ log

jaise ḳhair o shar kā duniyā meñ koī me.aar hai

lahr vo aa.ī ki ham haiñ aur nasheb-e-gumrahī

ġham ke aage band ab ke bāñdhnā dushvār hai

silsila āvāz kā dekho ki ḳhoshe sarsarā.e

phir khanak hai dhaat kī phir saañp kī phunkār hai

ek khula maidan tamasha-gah ke us par hai

jis mein har raqqas ka ek aaina tayyar hai

ret ke zariye hamari manzilen aur un ki hum

pas yahan samt-e-safar ka jaanna be-kar hai

raat aur tufan-e-abr-o-baad mere har taraf

dur lau deti hui ek mashal-e-ruKHsar hai

phir kabhi uTThe to mil lenge na itne dukh uTha

maut se hota hua ek rasta hamwar hai

is tarah bab-e-nasihat khol kar baiThe hain log

jaise KHair o shar ka duniya mein koi mear hai

lahr wo aai ki hum hain aur nasheb-e-gumrahi

gham ke aage band ab ke bandhna dushwar hai

silsila aawaz ka dekho ki KHoshe sarsarae

phir khanak hai dhat ki phir sanp ki phunkar hai