ek KHwab-e-atishin ka wo mahram sa rah gaya

ik ḳhvāb-e-ātishīñ kā vo mahram sā rah gayā

dīvār-o-dar meñ sho.ala-e-barham sā rah gayā

sher-e-vatan ke pyāle pe thiiñ kal ziyāfateñ

aayā jo tā-ba-lab to faqat sam sā rah gayā

maanā vafā barā.e-vafā ittifāq thī

tum sā rahā koī na koī ham sā rah gayā

ik lā-ta.alluqī kī fazā darmiyāñ rahī

jab do diloñ meñ farq bahut kam sā rah gayā

us sarv-qad kī tāb-o-mulā.em-ruḳhī kā raaz

isyāñ kī shab meñ dīda-e-pur-nam sā rah gayā

āḳhir huī bahār magar rañg-e-gul kā ḳhvāb

dil meñ duā nigāh meñ shabnam sā rah gayā

ik us ke rañg-e-ruḳh kī junūñ-sāz chhūT se

is zindagī meñ ḳhvāb kā aalam sā rah gayā

ek KHwab-e-atishin ka wo mahram sa rah gaya

diwar-o-dar mein shoala-e-barham sa rah gaya

sher-e-watan ke pyale pe thin kal ziyafaten

aaya jo ta-ba-lab to faqat sam sa rah gaya

mana wafa barae-wafa ittifaq thi

tum sa raha koi na koi hum sa rah gaya

ek la-talluqi ki faza darmiyan rahi

jab do dilon mein farq bahut kam sa rah gaya

us sarw-qad ki tab-o-mulaem-ruKHi ka raaz

isyan ki shab mein dida-e-pur-nam sa rah gaya

aaKHir hui bahaar magar rang-e-gul ka KHwab

dil mein dua nigah mein shabnam sa rah gaya

ek us ke rang-e-ruKH ki junun-saz chhuT se

is zindagi mein KHwab ka aalam sa rah gaya