ek KHwab laDakpan mein jo dekha tha wo tum the

ik ḳhvāb laḌakpan meñ jo dekhā thā vo tum the

paikar jo tasavvur meñ ubhartā thā vo tum the

ik aisā ta.alluq jo ta.alluq bhī nahīñ thā

phir bhī maiñ jise apnā samajhtā thā vo tum the

thā qurb kī ḳhvāhish meñ bhī kuchh husn ajab sā

jo gird mire rañg thā naġhma thā vo tum the

yak-dam jo ye tanhā.ī mahakne sī lagī thī

jhoñkā jo abhī ḳhushbū kā guzrā thā vo tum the

is vāste mai-ḳhvārī kā ilzām thā mujh par

mujh meñ jo vo ik nashsha sā rahtā thā vo tum the

ġhībat kā hadaf tum ne jo rakkhā thā vo maiñ thā

aur maiñ ne jise TuuT ke chāhā thā vo tum the

be-masraf-o-be-kār huuñ ab raakh kī mānind

chiñgārī thī jo mujh meñ jo sho.ala thā vo tum the

lagtā hai vo shahr ab kisī āseb-zada sā

kyā jis ke liye jashn sā barpā thā vo tum the

ek KHwab laDakpan mein jo dekha tha wo tum the

paikar jo tasawwur mein ubharta tha wo tum the

ek aisa talluq jo talluq bhi nahin tha

phir bhi main jise apna samajhta tha wo tum the

tha qurb ki KHwahish mein bhi kuchh husn ajab sa

jo gird mere rang tha naghma tha wo tum the

yak-dam jo ye tanhai mahakne si lagi thi

jhonka jo abhi KHushbu ka guzra tha wo tum the

is waste mai-KHwari ka ilzam tha mujh par

mujh mein jo wo ek nashsha sa rahta tha wo tum the

ghibat ka hadaf tum ne jo rakkha tha wo main tha

aur main ne jise TuT ke chaha tha wo tum the

be-masraf-o-be-kar hun ab rakh ki manind

chingari thi jo mujh mein jo shoala tha wo tum the

lagta hai wo shahr ab kisi aaseb-zada sa

kya jis ke liye jashn sa barpa tha wo tum the