ek KHwab mujassam hone se viran hua

ik ḳhvāb mujassam hone se vīrān huā

ik jugnū haath meñ aaya to be-jān huā

ik peḌ pe aa.e phal to parinde mil baiThe

ik shaḳhs kā bachpan biitā to anjān huā

ik dekhne vaalā dekh chukā jab āñkhoñ meñ

phir dil meñ an-dekhe kā Dar mehmān huā

vo ek safar ījād kā thā yā hijrat thī

jo rasta shahr se niklā ik maidān huā

maiñ raakh huā to sog kī koī baat nahīñ

is ḳhaak pe mere vasl kā din āsān huā

kuchh paudoñ tak ik din bhī dhuup na aa.ī thī

ik peḌ ke kaTne se jangal gunjān huā

ik ḳhvāb se jaise sau tā'bīreñ niklī hoñ

ik chehra kitne chehroñ kī pahchān huā

ek KHwab mujassam hone se viran hua

ek jugnu hath mein aaya to be-jaan hua

ek peD pe aae phal to parinde mil baiThe

ek shaKHs ka bachpan bita to anjaan hua

ek dekhne wala dekh chuka jab aankhon mein

phir dil mein an-dekhe ka Dar mehman hua

wo ek safar ijad ka tha ya hijrat thi

jo rasta shahr se nikla ek maidan hua

main rakh hua to sog ki koi baat nahin

is KHak pe mere wasl ka din aasan hua

kuchh paudon tak ek din bhi dhup na aai thi

ek peD ke kaTne se jangal gunjaan hua

ek KHwab se jaise sau ta'biren nikli hon

ek chehra kitne chehron ki pahchan hua