ek lafz aa gaya tha jo meri zaban par

ik lafz aa gayā thā jo merī zabān par

chhāyā rahā na jaane vo kis kis ke dhyān par

mujh ko talāsh karte ho auroñ ke darmiyāñ

hairān ho rahā huuñ tumhāre gumān par

mahfil meñ dostoñ kī vahī naġhma ban gayā

shab-ḳhūn kā jo shor thā mere makān par

be-shak zamīñ hanūz hai apne madār meñ

lekin dimāġh us kā to hai āsmān par

shāyad mirī talāsh meñ utrī hai charḳh se

jo dhuup paḌ rahī hai mire sā.ebān par

rahtā hai be-niyāz jo aab o sarāb se

khultā hai rāz-e-dasht usī sārbān par

ehsās us kā jāma-e-iz.hār māñge hai

uftād aa paḌī hai ye 'arshad' kī jaan par

ek lafz aa gaya tha jo meri zaban par

chhaya raha na jaane wo kis kis ke dhyan par

mujh ko talash karte ho auron ke darmiyan

hairan ho raha hun tumhaare guman par

mahfil mein doston ki wahi naghma ban gaya

shab-KHun ka jo shor tha mere makan par

be-shak zamin hanuz hai apne madar mein

lekin dimagh us ka to hai aasman par

shayad meri talash mein utri hai charKH se

jo dhup paD rahi hai mere saeban par

rahta hai be-niyaz jo aab o sarab se

khulta hai raaz-e-dasht usi sarban par

ehsas us ka jama-e-izhaar mange hai

uftad aa paDi hai ye 'arshad' ki jaan par