اک لمحہ بے خبر نہ رہے تیری راہ سے

اک لمحہ بے خبر نہ رہے تیری راہ سے

دیتے رہے صدائیں تجھے ہم نگاہ سے

موقعہ پرست غم نے کیا دل کو تار تار

اک پل رہا ہوں دور جو تیری پناہ سے

سیدھی سپاٹ راہ پہ چل کر نہ کچھ ملا

پائے ہیں تجربات و ہنر ٹیڑھی راہ سے

منزل کا راہ سخت سے سیدھا ہے رابطہ

غم بھی کہاں ہے دور خوشی کی پناہ سے

گر جھوٹ بھی کہا ہے تو سچ کے بچاؤ میں

ہم نے ثواب یوں بھی کمایا گناہ سے

بجھنے دیا نہ اشکوں سے غم کا دیا کبھی

روشن رکھا ہے عشق کو گرمیٔ آہ سے