ek mahak si dam-e-tahrir kahan se aai

ik mahak sī dam-e-tahrīr kahāñ se aa.ī

naam meñ tere ye tāsīr kahāñ se aa.ī

pahlu-e-sāz se ik mauj-e-havā guzrī thī

ye chhanaktī huī zanjīr kahāñ se aa.ī

dam hamārā to rahā halqa-e-lab hī meñ asiir

bū-e-gul ye tirī taqdīr kahāñ se aa.ī

ahl-e-himmat ke miTāne se to fāriġh ho le

dahr ko fursat-e-tāmīr kahāñ se aa.ī

go tarastā hai abhī tak tirī tahrīr ko dil

phir bhī jaane tirī tasvīr kahāñ se aa.ī

yūñhī ho jaatā hai qismat se koī ġham bedār

ishq ke haath meñ tadbīr kahāñ se aa.ī

kis taraf jaate haiñ yaaro ye bigaḌte hue naqsh

ye sañvartī huī tasvīr kahāñ se aa.ī

lahn-e-bulbul kā chalā kaun se gul par afsūñ

sirf ik tarz hai tāsīr kahāñ se aa.ī

paḌ gayā soz-e-suḳhan haath hamāre kyūñkar

ḳhaak hone ko ye iksīr kahāñ se aa.ī

ek mahak si dam-e-tahrir kahan se aai

nam mein tere ye tasir kahan se aai

pahlu-e-saz se ek mauj-e-hawa guzri thi

ye chhanakti hui zanjir kahan se aai

dam hamara to raha halqa-e-lab hi mein asir

bu-e-gul ye teri taqdir kahan se aai

ahl-e-himmat ke miTane se to farigh ho le

dahr ko fursat-e-tamir kahan se aai

go tarasta hai abhi tak teri tahrir ko dil

phir bhi jaane teri taswir kahan se aai

yunhi ho jata hai qismat se koi gham bedar

ishq ke hath mein tadbir kahan se aai

kis taraf jate hain yaro ye bigaDte hue naqsh

ye sanwarti hui taswir kahan se aai

lahn-e-bulbul ka chala kaun se gul par afsun

sirf ek tarz hai tasir kahan se aai

paD gaya soz-e-suKHan hath hamare kyunkar

KHak hone ko ye iksir kahan se aai