ek makan aur bulandi pe banane na diya

ik makāñ aur bulandī pe banāne na diyā

ham ko parvāz kā mauqa.a hī havā ne na diyā

tū ḳhudā ban ke miTā.egā hameñ hī ik din

sar tire dar pe isī Dar ne jhukāne na diyā

muttahid hone kā jazba thā sabhī meñ lekin

muttahid hone kā mauqa hī havā ne na diyā

tum pe chhā jaate shajar bante jo nanhe paude

tum ne achchhā hī kiyā paañv jamāne na diyā

vo to āmāda thā bandoñ kī shikāyat sun kar

kuchh farishtoñ ne zamīñ par use aane na diyā

aap Darte haiñ ki khul jaa.e na aslī chehra

is liye shahr ko ā.īna banāne na diyā

ek makan aur bulandi pe banane na diya

hum ko parwaz ka mauqa hi hawa ne na diya

tu KHuda ban ke miTaega hamein hi ek din

sar tere dar pe isi Dar ne jhukane na diya

muttahid hone ka jazba tha sabhi mein lekin

muttahid hone ka mauqa hi hawa ne na diya

tum pe chha jate shajar bante jo nanhe paude

tum ne achchha hi kiya panw jamane na diya

wo to aamada tha bandon ki shikayat sun kar

kuchh farishton ne zamin par use aane na diya

aap Darte hain ki khul jae na asli chehra

is liye shahr ko aaina banane na diya