ek masarrat mere atraf ko anjaani de

ik masarrat mire atrāf ko anjānī de

nutq ko lab se uThā aañkh ko hairānī de

hai tamannā ki chamakte raheñ mehvar ke baġhair

havas-e-ḳhām na de ishq tū lā-fānī de

naqsh to saare mukammal haiñ ab uljhan ye hai

kis ko ābād kare aur kise vīrānī de

dekh kar aa.e haiñ kuchh log vahāñ sabz lakīr

maiñ use dekh sakūñ itnī girāñ-jānī de

ye to dekheñ ki hai buniyād meñ kyā kyā mahfūz

ghar banāyā hai to ab varta-e-tuġhyānī de

aks-e-ruḳh kaisā yahāñ kuchh bhī nahīñ hai dil meñ

ham ko shādāb na kar hausla tūfānī de

sāmne tere ham is ḳhaak se sharminda na hoñ

maut āsān ho yā rizq meñ arzānī de

jaane kyā kyā nazar aatā hai tamannā bar-kaf

mere mālik mujhe do roz kī sultānī de

hausla haar ga.ī tishna-dahānī 'haqqī'

ab tū mashkīza uThā aur mujhe paanī de

ek masarrat mere atraf ko anjaani de

nutq ko lab se uTha aankh ko hairani de

hai tamanna ki chamakte rahen mehwar ke baghair

hawas-e-KHam na de ishq tu la-fani de

naqsh to sare mukammal hain ab uljhan ye hai

kis ko aabaad kare aur kise virani de

dekh kar aae hain kuchh log wahan sabz lakir

main use dekh sakun itni giran-jaani de

ye to dekhen ki hai buniyaad mein kya kya mahfuz

ghar banaya hai to ab warta-e-tughyani de

aks-e-ruKH kaisa yahan kuchh bhi nahin hai dil mein

hum ko shadab na kar hausla tufani de

samne tere hum is KHak se sharminda na hon

maut aasan ho ya rizq mein arzani de

jaane kya kya nazar aata hai tamanna bar-kaf

mere malik mujhe do roz ki sultani de

hausla haar gai tishna-dahani 'haqqi'

ab tu mashkiza uTha aur mujhe pani de