ek masraf-e-auqat-e-shabina nikal aaya

ik masraf-e-auqāt-e-shabīna nikal aayā

zulmat meñ tirī yaad kā ziina nikal aayā

har-chand ki mahfil ne mirī qadr bahut kī

uktā ke añgūThī se nagīna nikal aayā

phir koh-kanī Dhaal rahī hai na.e teshe

phir faḳhr se chaTTān kā siina nikal aayā

sach-much vo taġhāful se kināra hī na kar le

maiñ sochne baiThā to pasīna nikal aayā

ġhota jo lagāyā hai to māyūs huā huuñ

har mauj ke dāman meñ safīna nikal aayā

ghabrāyā huā dekh ke patjhaḌ ke aqab se

mere liye sāvan kā mahīna nikal aayā

jab vaqt ne chhānī haiñ 'muzaffar' kī bayāzeñ

har she'r meñ nudrat kā dafīna nikal aayā

ek masraf-e-auqat-e-shabina nikal aaya

zulmat mein teri yaad ka zina nikal aaya

har-chand ki mahfil ne meri qadr bahut ki

ukta ke anguThi se nagina nikal aaya

phir koh-kani Dhaal rahi hai nae teshe

phir faKHr se chaTTan ka sina nikal aaya

sach-much wo taghaful se kinara hi na kar le

main sochne baiTha to pasina nikal aaya

ghota jo lagaya hai to mayus hua hun

har mauj ke daman mein safina nikal aaya

ghabraya hua dekh ke patjhaD ke aqab se

mere liye sawan ka mahina nikal aaya

jab waqt ne chhani hain 'muzaffar' ki bayazen

har she'r mein nudrat ka dafina nikal aaya